اكاۋىنتىڭىزعا كىرىڭىز

پايدالانۋشى اتى *
قۇپيا ءسوز *
مەنى ەستە ساقتا

اككاۋنتى جاساۋ

جۇلدىزشامەن (*) بەلگىلەنگەن مىندەتتى ورىندار تولتىرىلۋ قاجەت.
اتى- ءجونى *
پايدالانۋشى اتى *
قۇپيا ءسوز *
قۇپيا ءسوزدى قايتالاڭىز *
Email *
Email پوشتانى قايتالاڭىز *
Captcha *
Reload Captcha

قىلمىسكەر مەن قىزىل قۇمىرسقا

 

عيبراتتى اڭگىمە


            تاۋ تاعىسىنداي تاس توسەنىپ، تۇندەلەتىپ تىعىلا قالاعا كىرىپ، اشتان قاتپاس ءۇشىن ازىق ىزدەپ، تاڭ قىلاڭ بەرە تاۋعا تارتىپ تۇراتىن وردابەكتىڭ ورماندى جاعالاعانىنا دا جەتى تاۋلىكتىڭ ءجۇزى بولعان.
كوكتەم كەلىپ كوكجيەكتىڭ كوركى كىرىپ، تىڭ تىرشىلىكتىڭ تىنىسى كەڭىگەن كۇندەردىڭ ءبىرى. كۇندەگى داعدىسىمەن تاڭ سوگىلە سۇرىنە باسىپ، سۇمەڭدەپ كەلىپ ورمانعا سۇڭگىگەن وردابەك قۇلاپ جاتقان قۋراعان اعاشتىڭ ءبىر شەتىنە وتىرا كەتتى. ەڭكەيگەن كۇيى ەنتىگىن ارەڭ باسىپ، ەندى عانا ەسىن جىيعانداي بولدى. جاڭاعى ساقشىلار سوڭىما ءتۇسىپ جۇرمەسىن دەپ ساقتانا ساي جاققا سۇقسيىپ قويادى. ەشكىم كورىنبەگەن سوڭ الگىندە مەشىتتىڭ مولداسى بەرگەن ماي شەلپەكتىڭ بىرەۋىن پاكەتتەن سۋىرىپ الدى دا اسىعىس اۋزىنا تىعا باستادى. ءاپ ساتتە بىرنەشە شەلپەكتى قولىنداعى سارىاعاش سۋىنىڭ قۇتىسىنا قۇيىلعان سۋمەن كەۋسەپ، ورنىنا جىبەرگەن سوڭ ارجاعىنا ەل قونىپ، قالجىراعان بويى بەكىپ، بۋىندارى قاتايعانداي سەرگىپ قالدى. ەندى ول جاڭاعى مەشىت مولداسى ايتقان ناسيحاتتار ەسىنە ءتۇسىپ تەسىلە جەرگە قاراپ تەرەڭ ويعا شومىلىپ كەتتى. كەنەت ءبىر قىزىل قۇمىرىسقانىڭ بەلى بۇگىلىپ، تىپىرشىپ جاتقانىن كورىپ، كوز الماي قاراپ وتىرعان- دى. سالدەن سوڭ ءبىر قۇمىرىسقا كەلىپ الگى جارالى ۇيالاسىن ارقالاپ الا جونەلدى. نە ىستەر ەكەن دەپ باقىلاپ وتىرعان وردابەك الگى قۇمىرىسقانىڭ جارالى ۇيالاسىن ۇياسىنا الىپ كىرگەنىن كورىپ جۇرەگى سىزداپ كەتتى. و، توبا! الگىندە تاڭ نامازىن وتكىزىپ، مەشىتتەن شىققان مولدا دا وسىنداي مىسال كەلتىرىپ: «ادام تۇگىلى جاندىكتەر دە ءوز ۇيالاسىنا مەيىرىمدىلىك تانىتىپ، قايىرىمدىلىق قىلادى. بۇل الەمدە شەكسىز مەيىرىمدى اللانىڭ ادامدارعا عيبرات الۋ ءۇشىن جاراتقان كەرەمەتتەرىن ساناپ تاۋسۋ مۇمكىن ەمەس. تەك، اقىل يەسى رەتىندە ويلانۋعا ميىمىز جەتسە. . . » دەگەن ءسوزىنىڭ اينىماعان اقيقاتىن ەندى مىنە، ءوز كوزىمەن كورىپ تۇر.
ال، قۇمىرسقا ەكەش قۇمىرسقا دا ءوز ۇيالاسىنا مەيىرىمدى ەكەن. مولدەكەڭ ايتقانداي قايىرىمدىلىق قىلۋدىڭ ۇلگىسىن مىنا مەن توپاسقا قۇدايدىڭ ءوزى قۇمىرسقا ارقىلى كورسەتىپ جاتىر. مەن بولسام ءوز تۋعان اعاما ايۋاندىق جاساپ ءجۇرىسىم مىناۋ. قانداي قاتىگەز ەدىم؟ . . .
 وسىلايشا وردابەكتىڭ ويىنا وزبىرلىق قىلعان وعاشتىقتارى مەن وپاسىزدىعى ورالا بەردى.
ءيا. مولدەكەڭ دۇرىس ايتادى. بىراق، ول مەنىڭ قايىرىمسىز قاتىگەزدىك قىلعانىمدى قايدان ءبىلىپ قويدى؟ !
وردابەك ەندى وسىنى ويلاپ اڭ- تاڭ.
مۇمكىن ول مەنى تانىپ تۇرعان شىعار. مەنىڭ قاشىپ كەتكەن حابارىمدى كوگىلدىر ەكران ارقىلى كورگەن شىعار؟ ! سۋرەتىمدى كورسەتىپ ىشكى ىستەر ءبولىمى ىزدەۋ سالعان شىعار؟ !
وردابەكتىڭ ويىنا كوپ سۇراقتار جۇمباق بولىپ جابىسا بەردى.
ءوز كەزەكشىلىگى كەزىندە بۇل بەيمالىم ادامدى مەشىت جاماعاتىنا تاڭ نامازىن وتكەرىپ بولىپ، ۇيىنە قايتار جولىندا مەشىت توڭىرەگىنەن بىرنەشە رەت بايقاعان نايب يمام يمانجان بۇل ادامنىڭ بەكەر جۇرمەگەنىن سەزگەن- ءدى. مەشىتتەن شىققان جاماعاتتان تيىن- تەبەن سۇراپ الىپ، قارىننىڭ قامىن جاساپ جۇرگەنىن وسىمەن ءۇشىنشى رەت بايقاعان ول: «مىنا جىگىت ماسكۇنەم نەمەسە ناشاقورعا ۇقسامايدى. دەمەك، ءبىر سىرى بار- اۋ»، – دەپ ويلاعان. ال، بۇگىن وزىنە بۇرىلىپ قايىرىم قىلىپ كەتۋىن وتىنگەن سوڭ مەشىتتەن ءبىر پاكەت شەلپەك اكەلىپ بەرگەن. جولىڭا دەپ مىڭ تەڭگەسىن ۇستاتقان. بەت- بەينەسىن جاقىننان كورىپ، تىلدەسكەندە قويعان سۇراقتارىنان جالتارىپ تۇرعانىن ءتۇسىنىپ، كوزىندەگى كورىنىپ تۇرعان كومەسكى جازۋدى جازباي وقىعان تاجىريبەلى يمام ونىڭ بىردەڭەنى بۇلدىرگەنىن ءبىلىپ ادەيىلەپ مەيىرىمدىلىك پەن قايىرىمدىلىق جانە تاۋبەگە كەلۋ تاقىرىبىندا ناسيحات ايتقان بولاتىن.
باۋىرىم، ءبىز پەندەمىز. جاڭىلمايتىن جاق، سۇرىنبەيتىن تۇياق جوق دەپ اتا- بابامىز ايتقانداي پەندە بولعاسىن پەندەشىلىگىمىزدىڭ پەيىلىمىزدى پايداسىزعا سۇيرەلەپ، سۇرىندىرەتىن تۇستارى بولادى. سۇيىكتى پايعامبارىمىزدىڭ (س. ع. س): «ادىلسىزدىكتەن قورقىڭدار، ويتكەنى ادىلسىزدىك قيامەتتە قاراڭعى تۇنەك بولىپ كەلەدى جانە ساراڭدىقتان قورقىڭدار، ويتكەنى سەندەرگە دەيىن ءومىر سۇرگەندەردى ساراڭدىق، ءبىرى- ءبىرىنىڭ قانىن توگۋگە جانە تىيىم سالىنعان نارسەلەردى ورىنداۋعا تۇرتكى بولىپ، قۇرتقان» – دەگەن ءحاديسىن «ءسابا» سۇرەسىنىڭ 39- اياتىنداعى: «ء…تيىستى ورىنعا ءبىر نارسە جۇمساساڭدار، سوندا اللاھ؟ تاعى ەسەسىن بەرەدى…»، – دەگەن اياتپەن جانە «باقارا» سۇرەسىنىڭ 273- اياتىنداعى: «…سەندەر نە حايىر بەرسەڭدەر، راسىندا اللا ونى بىلەدى. »، – دەگەن اياتپەن بايلانىستىرىپ، مەيىرىمدىلىك پەن جاقسىلىق جاساۋعا جانە ادامدارعا قايىرىمدى بولۋعا شاقىرعان. ال، قايىرىمدىلىق دەگەن تەك بايلىقپەن عانا باعالانبايتىنىن، بىرەۋگە جىلى سويلەۋدىڭ، جاقسىلىق جاساۋدىڭ ءوزى قايىرىمدىلىق ەكەنىن ەسىنە سالا وتىرىپ، «ناسىر» سۇرەسىنىڭ 3- اياتىنداعى «ەندى راببىڭدى ماقتاي دارىپتەپ، ودان جارىلقاۋ تىلە. نەگىزىنەن اللا، تاۋبەنى وتە قابىل ەتۋشى»، – دەگەن اياتتى ايتىپ تاۋبەگە كەلۋدىڭ جولىن ۇيرەتىپ، قۇمىرىسقا ەكەش قۇمىرىسقانىڭ دا ۇيالاسىنا مەيىرىمدىلىك جاساپ، قايىرىمدىلىق قىلاتىنىن مىسال ەتىپ تۇيىندەگەن.
وردابەك ەندى وسىنى ويلاپ، اراقتىڭ ۋىنان ايىعىپ، ەسى ەندى كىرگەن ادامداي اڭىرىپ وتىر.
«. . . تاۋباعا كەلگەندى كەشىرەمىن» دەپ اللانىڭ ءوزى ايتىپتى عوي. ماعان ءالى كەش ەمەس. ءتارتىپ ساقشىلارىنا ءوزىم بارىپ بەرىلىپ ايىبىمدى موينىما الايىن، تاۋباعا كەلەيىن دەگەن ويمەن تاۋدان تومەنگە تۇسۋگە بەكىنگەن بويى وسى ەدى. كەنەت تومەنگى سايدان ءبىر بالانى جەتەلەگەن ەر ادامدى كوزى شالدى. نەگە ەكەنى بەلگىسىز بىردەڭەدەن سەكەم العانداي مەلشيگەن كۇيى الگى ادامنىڭ قيمىلىن باقىلاپ قادالا قاراپ قالدى. جاڭاعى ادام بالانى جەتەلەگەن بويى تومەندەگى تالدىڭ اراسىنا سۇڭگىپ كەتتى. سالدەن سوڭ قىزىل ءتۇستى كيىنگەن الگى بالانىڭ قاشىپ شىققانىن بايقادى. اناۋ بولسا ارتىنان قۋىپ كەلىپ، بالانى ۇستاپ الدى دا كوتەرگەن كۇيى تالدىڭ اراسىنا قايتا كىرىپ كەتتى.
ماسەلەنىڭ ءمانىسىن تۇسىنە قويعان وردابەك: «وي، اتاڭا نالەت» دەگەن ءسوزدى اسىعا ايتىپ، تومەنگە قاراي ىرشىپ- شورشىپ جۇگىرە جونەلدى. وقىرا ءتيىپ، تومارعا سۇرىنگەن تاناداي توڭقالاڭ اسىپ بىرنەشە مارتە ەڭىسكە قاراي ەكپىنمەن دومالاپ تا كەتتى. قۇلديلاي ۇشقان كۇيى الگى ادام بالانى الىپ كىرگەن تالدىڭ تۇبىنە كەلىپ ءبىر- اق تىرەلدى. الگى ارسىز بولسا بالانى باقىرتىپ ارام ويىن ەندى ىسكە اسىرماققا بەلدىگىن شەشىپ ۇلگىرىپتى. دەر كەزىندە جەتكەن وردابەك ويلانىپ تۇرماستان ارىستانشا اتىلىپ كەلىپ، ازعىندى ەڭىسكە قاراي ەكپىنمەن قۇشاقتاي قۇلاپ، بەس التى مەترگە ۇمار- جۇمار كۇيى دومالاپ ءتۇستى. انا ازعىننىڭ شالبارى تىزەسىنە ءتۇسىپ، تۇرۋگە دە ۇلگىرمەي قالدى. وتە تەزدىكپەن ازعىننىڭ اعىتىلعان بەلدىگىن سۋىرىپ الىپ، قولىن ارتىنا قايىرعان كۇيى بايلاپ تاستادى دا سىرتقى شالبارىنىڭ ءبىر بالاعىن سىپىرىپ الىپ ەكى اياعىن قوساقتاپ ماتاپ تاستادى. ورنىنان قايتا تۇرىپ جۇگىرگەن كۇيى بالاعا جەتىپ كەلدى. 5- 6- جاس شاماسىنداعى كىشكەنتاي قىز قورىقققانى سونشا تالدىڭ تۇبىنە تىعىلىپ، تۇنشىعا جىلاپ وتىر ەكەن. «قورىقپا بالاپان، قورىقپا. ەندى ساعان ەشكىم تيىسە المايدى. وڭباعاندى بايلاپ تاستادىم. جۇرە عوي. ۇيىڭە اپارايىن» دەپ اتى- ءجونىن، بۇل ازعىنعا قالاي تاپ بولعانىن سۇراپ، بالانى جۇباتتى. سويتسە الگى ازعىن: «اناۋ جەردە مەنىڭ ءۇيىم بار. اۋلامدا جەمىس اعاشى بار. مەنىڭ سەنىمەن جاستى كىشكەنتاي قىزىم بار. ەكەۋىڭە اعاشتان كوپ الما الىپ بەرەمىن» دەپ الداپ الىپ كەلىپتى. ازعىن بولسا تىزەسىن توپىراق قىلماۋدىڭ دا قامىن الدىن الا ويلاستىرعان سىڭايلى. قايدان العانى بەلگىسىز قازاقتىڭ كوك بايراعىن توسەنىش قىلىپ قويىپتى. وي، وڭباعان تۋىمىزدى تاعىلىقتىڭ تابانىنا تاپتاماعىن قارا دەپ كىجىنگەن وردابەك اۋزىمەن ازعىندى اياماي سىباپ تا الدى. كىشكەنتاي قىزدى جەتەكتەپ، پەدوفيلدى جەلكەلەگەن كۇيى اۋدانداق ءىىب- نە الىپ كەلدى.
ءمان- جايدى تولىق بايانداپ بولعان وردابەك كىسەن سالۋعا ەندى ءوزىنىڭ قوس قولىن قۇقىق قورعاۋشىلارىنا ۇسىندى.
ءبىر جۇمانىڭ الدىندا اۋىلدان كەلگەن اعاسىمەن ارادا ارازدىق بولىپ، ارازدىقتىڭ ارتى تومپەشتەسكەن توبەلەسكە ۇلاسىپ، اشۋ ارقالاعان وردابەك ۇستەل ۇستىندە تۇرعان نان كەسەتىن پىشاقتى اعاسىنا بىرنەشە مارتە سىلتەگەن- ءدى. قىپ- قىزىل قانعا بويالعان اعاسى ەستەن تانىپ قۇلاعان تۇستا، ىستەگەن ىسىنەن ەسىن جيا الماعان وردابەك ەشتەڭەگە قاراماستان قاشا جونەلگەن. سول كەتكەن كۇيى قالانىڭ تۋ سىرتىنداعى تاۋعا شىعىپ، ورمانعا كىرىپ كەتكەن. ەندى مىنە ويلانباي ىستەگەن ىسىنە وكىنىپ وتىر. قۇتقارۋشى جەدەل جاردەمنىڭ كولىگىمەن ەمحاناعا دەر كەزىندە جەتكىزىلگەن اعاسىنىڭ جاعدايى قۇداي وڭداعاندا قازىر جاقسارىپ، بەتى بەرى قاراعان- دى.
تەمىر توردىڭ ار جاعىنداعى تار بولمەنىڭ ءبىر بۇرىشىندا ءبۇرىسىپ وتىرعان وردابەك ەندى باياعى قىزىل قۇمىرسقانى ويلاپ، جۇرەگى قان جىلايدى. «ءيا، اللا ءوزىڭ كەشە كور. مەنى تۋرا جولىڭا تۇسىرە كور، قۇمىرىسقا قۇرلى اقىلىم بولماعان اقىماق باسىمدى كەشە كور! ! ! » دەيدى كۇبىرلەپ.
كوكىرەكتەن شىققان اۋىر كۇرسىنۋمەن تەمىر ەسىكتى تاس بولمەنىڭ ءىشى كۇڭگىرت تارتىپ كۇرەڭىتە بەردى. وسى ساتتە مولدەكەڭ ايتقان ءتاۋبا جايلى اللانىڭ اياتى ەسىنە تۇسكەنى سول ەدى، ءبىر عاجايىپ جارىق نۇر كەلىپ بويىن جىلىتىپ، جۇرەگىن تىنىشتاندىردى.
ءتاۋبا! ءتاۋبا! ءتاۋبا! ! ! . . .
شارق- شۇرق ەتكەن تەمىر ەسىكتىڭ شويىن قۇلپىنىڭ داۋسى وردابەكتى سەلت ەتكىزدى. اشىلعان ەسىكتىڭ ءارى جاعىنان ەڭگەزەردەي تۇرمە كۇزەتىنىڭ كەزەكشى باستىعى وردابەككە جىميىپ، بەرى شىق دەگەن يشارا جاسادى. وردابەك ورنىنان تۇرىپ تۇرمە كۇزەتشىسىنىڭ ارتىنان ەرىپ، سىرتقا شىقتى. الدىنان ارازداسىپ ايىرىلىسقان اعاسى مەن تۋىس- تۋعاندارى قارسى الدى. ارت جاقتا تۇرعان باياعى ءبۇلدىرشىن بۇر قۇشاق گۇلدى كوتەرگەن كۇيى جۇگىرىپ كەلىپ وردابەكتىڭ قولىنا ۇستاتتى دا اعاتاي دەپ قۇشاقتاي كەتتى.
ءبۇلدىرشىننىڭ جەتپىستى جەلكەلەگەن اتاسى وردابەكتىڭ الدىنا كەلىپ: «قاراعىم، ساعان اللا رازى بولسىن! نەمەرەمە جاساعان قايىرىمىڭنىڭ قارىمتاسىن تىپتەن قايتارا الماسپىن. ءبىز ساعان رازىمىز. قايىرىمىڭنىڭ قارىمى اللادان قايتسىن! » دەپ اق باتاسىن بەردى.
سالدەن سوڭ جاسقا تولعان جانارىن سىعىمداپ، كوزىن اشىپ كەلىپ تۇرعان كوپشىلىككە قاراپ ەدى، يمانجان يمام دا وسىندا ەكەن. ونىڭ دا جانارىنان پورا- پورا جاس پارلاپ تۇر. . .

بىرلىك توقاي
الماتى قالاسى.

بۇل شىعارلىمعا باعاڭىز
(0 داۋىس)
Ad Sidebar

Latest Tweets

@envato_help Dear ticket id: 1266898. No one answering the ticket. 2 days without a solution. Please, check.
Insurance Agency Joomla Business Template on #Themeforest https://t.co/GKqY99ixQX https://t.co/WgAaR3wDBc
GeoBin - Digital Marketing Agency, SEO WordPress Theme Updated on #Themeforest https://t.co/drKfnOA82e https://t.co/lR8UFr7zPp
Follow Themewinter on Twitter
Яндекс.Метрика